मोर दुवरिया अइहें ना

मइया भारती के संस्कार के पुजरिया

मोर दुवरिया अइहें ना ॥

करिहें देश रखवरिया ,

मोर दुवरिया अइहें ना ॥

सीमवाँ पर दीहें आपन जनवाँ लुटाई

हर घरी देश खातिर छतिया सजाई ।

उनुके से लउकत टह टह अंजोरिया 

मोर दुवारिया अइहें ना ॥ करिहें............

देश से गुलमिया के दीहने मेटाई

बिना गिनले आपन सिरवा कटाई

काँपत दुसमन देखी भगत के तेवरिया

मोर दुवरिया अइहें ना ॥ करिहें............

सुखदेव भगत सिंह राजगुरु भाई

भइलें अमर आपन आहुति चढ़ाई

देश खाति अरपित जवानन के उमिरिया

मोर दुवरिया अइहें ना ॥ करिहें............

·         जयशंकर प्रसाद द्विवेदी 

सभै सुनाई होरी मे

हिन्दी हिन्दी उहो क़हत हौ

हिन्दी गाईं होरी मे ।

रटल रटावल घीसल पीटल

सभै सुनाई होरी मे ॥

पढ़ल उरुवा अनपढ़ मंत्री

इहो बताईं होरी मे ।  

लिख लोढ़ा पढ़ पाथर के हौ

भेंट कराईं होरी मे ॥

अंडे क फंडा सभ देखल

उहो नचाई होरी मे ।

इटली वाली पंचर सइकिल

कहाँ चलाईं होरी मे ॥ 

गूंगवा बोलल ढेर दिनन मे

फूल चढ़ाईं होरी मे ।

भरल तिजोरी देंवका चाटी

पचरा गाईं होरी मे ॥

उड़नखटोला फाटल कुरता

बात बनाई होरी मे ।

नेताजी के नव लखिया मे

तेल भराईं होरी मे ॥ 

मंदिर मंदिर माथा टेकस

पास कराईं होरी मे ।

ई वी एम मे सभ नीमन होखो  

लाज बचाईं होरी मे ॥

भांग घोंट के मातल काशी

ठेंग देखाई होरी मे ।

डराई डे बा थैली से ही

काम चलाईं होरी मे ॥

साँझ अवध के सुबहे बनारस

फेर बताईं होरी मे ।

खुने खून नवाबी नगरी

तहजीब सिखाईं होरी मे ॥

धरम जाति के फइलल जहर

उहो मेटाईं होरी मे ।

सभ केहु इहवाँ आपन बाटे

गरे लगाईं होरी मे ॥  

·         जयशंकर प्रसाद द्विवेदी