: बाबूजी बहुते कुछ समुझवनी ह :

आजु हमरा के नियरा बईठा के

बाबूजी बहुते कुछ समुझवनी ह ।

दुनियाँ – समाज के रहन सभ  

हमरा के विस्तार मे बतउनी ह ॥ बाबूजी बहुते कुछ....  

राजनीति के रहतब – करतब

एनी ओनी के ताक - झाँक

बोली ठिठोली के मतलबों आ

नीक – निहोरा क आईना देखवनी ह ॥ बाबूजी बहुते कुछ....

लोक - परब के मर्यादा भी

बेमतलब के अक –बक मे

साँच झूठ आ सुभूमि कुभूमि

जीयला क मरमों बतउनी ह ॥ बाबूजी बहुते कुछ...

घर दुअरा के सिकुड़न मे

रिस्ता निभवला के बिपत होला

हाड़ी पतरी औरो गाँव देहात मे

परसिद्ध मनईन के चरित्तर जनवनी ह ॥ बाबूजी बहुते कुछ....

एगो अलगा पहचान के मंतर

समवेत स्वरन के अनंतर से

मिजाज के नेह छोह क उड़ान

मित्तर संहतिया के माने गुनवनी ह ॥

बाबूजी बहुते कुछ समुझवनी ह ॥

·         जयशंकर प्रसाद द्विवेदी